གསར་བརྗེ་ནི་བསམ་བློ་བཅིངས་གྲོལ་གཏོང་བྱེད་ཡིན་པ་ལས་མི་གསོད་སྤྱད་ཅིག་ཁྱོན་ནས་མིན།
                                                                                  —ལུའུ་ཞུན་གྱིས།

     རྙིང་ཚབ་གསར་བརྗེ་ཞེས་པའི་མིང་བརྡ་འདིས་མི་རྣམས་བར་སྐབས་ཤིག་ལ་ཧ་ལས་ཤིང་ཧང་སངས་པར་བྱས་མྱོང་། ཅི་ཁག་སྟེ། མིང་བརྡ་དེ་ནི་རིག་གསར་གྱི་རླུང་ནག་འཚུབ་པའི་སྐབས་སུ་རིག་གནས་ཤིག་འཇོར་དང་ཁེམ་གྱིས་གཏོར་ཤིང་འགྲེང་དང་ཐག་པས་དྲུད་པའི་དྲག་པོའི་གཏོར་བཤིག་ཅིག་གི་ལོ་རྒྱུས་མཚོན་བྱེད་རེད། ལོ་རྒྱུས་ཀྱི་ངོ་གདོང་ལ་ནོར་རྟགས་ཀྱི་རྨ་ཁ་བཏོད་པ་དེ་གནམ་སྔོན་པོ་ཚང་གིས་སྐྱོན་དུ་ཁས་མི་ལེན་ཞིང་། མི་སེར་དག་གི་ཀུན་གཞིའི་ཟབ་ས་རུ་ནམ་ཡང་ཡལ་ཐབས་བྲལ་བའི་འཇིགས་རུང་གི་སྐྱོ་གར་ཆེན་པོ་དེ། བོད་མིའི་ལོ་རྒྱུས་ཀྱི་བྲང་གཞུང་ནས་རྡོ་བརྐོས་རི་མོ་ཇི་བཞིན་དུས་གཏན་དུ་འཇགས་ཐབས་བྲལ། ཏག་ཏག་འདིའི་ཕྱོགས་ལ་རྣ་བ་ཨེན་ཙམ་གཡོར་མཁན་ཞིག་ཡིན་ཚེ། དེ་ནི་ལོ་རྒྱུས་ཤིག་དེ། དེ་ནི་སྐྱོ་གར་ཞིག་སྟེ། དེ་ནི་མིག་ཆུ་ཞིག་ཡིན་པའི༼གདངས༽སུ་ལ་ཡང་ཡོད་སྲིད། རང་རེའི་བོད་ལ། མིང་བརྡ་དེའི་མཚོན་བྱེད་ཀྱི་དྲག་པོའི་རླུང་འཚུབ་འཇགས་ནས་མི་ལོ་ལྔ་བཅུ་ལྷག་འགོར་སོང་། མི་ལོ་ལྔ་བཅུ་ལྷག་གི་རིང་ལ་རྙིང་ཚབ་རྙིང་བས་བྱས་ཤིང་། རྙིང་བ་བརྒྱུད་འཛིན་བྱས་ནས་འོང་བ་རེད། རྙིང་བས་འདོད་པ་ཚིམ་ཞིང་རྙིང་བ་སྙིང་ལ་བཅིངས་ནས་འོང་བ་རེད། སྙིང་ནས་རྙིང་བར་དུངས་ཤིང་རྙིང་བ་ནོར་དུ་རློམ་ནས་ཐོན་པ་རེད། དེ་ལྟར་ཡིན་པས། རྙིང་བ་དགོས་འདོད་དཔུངས་འཇོམས་སུ་རློམ་པའི་བོད་མིའི་སྤྱི་ཚོགས་ནས། ན་གཞོན་སྐོར་ཞིག་གིས་རྙིང་ཚབ་གསར་བརྗེ་ཞེས་པའི་སྐད་འབོད་ཀྱི་གནས་ལུགས་རིང་མོ་བགྲང་པར། སྐྱ་སེར་མང་པོ་ཞིག་ཡང་བསྐྱར་ཧང་སང་ཞིང་དངངས་ཤོར་བ་ལ་ཁག་མེད་དེ། ཁོ་ཚོའི་བག་ཆགས་ཀྱི་གསེབ་ན་རྙིང་ཚབ་གསར་བརྗེ་ཡི་སྦྱོར་བ་དྲག་པོ་ཞིག་གི་གཏམ་རྒྱུད་ཡོད་པས་སོ།། 
   དེ་ལྟར་ཡོད་མོད། མིང་བརྡ་རྙིང་བ་ལ་ཚེ་སྲོག་གསར་བ་ཞུགས་པའི་ཧྥ་རན་སིའི་བློ་འབྱེད་ལས་འགུལ་དང་། རྒྱ་ནག་གི་ལྔ་བཞིའི་ལས་འགུལ་སོགས་ཅི་ཞིག་ལ་བྱུང་བ་སོགས། རྙིང་ཚབ་གསར་བརྗེ་ཡི་ལས་འགུལ་དེ་དག་གི་ཉམས་མྱོང་ཁ་ཟས་དག་བོད་མི་དག་གི་རྣམ་དཔྱོད་ཀྱི་སོ་ཡིས་དུམ་བུ་དུམ་བུ་བྱས་ཏེ་ལྡད་ཐུབ་རྒྱུ་ན། རང་རེ་བ་ཡང་ལྷོད་ལ་བབ་སྟེ།འགྲོ་བ་མིའི་རིགས་ཀྱི་ལོ་རྒྱུས་ཀྱི་མྱོང་བ་དེ་རང་སྟེང་དུ་ལེན་ཐུབ་རྒྱུ་རེད་ལ། འགྲོ་བ་མིའི་རིགས་ཀྱི་ཡོངས་ཁྱབ་རིན་ཐང་གི་ཤེས་བྱའི་ལམ་བུར་བསྐྱོད་རྒྱུའི་རྨང་ཡང་སྔ་ས་ནས་གདིང་ཐུབ་རྒྱུ་རེད།གནས་ལུགས་ཀྱི་ངོས་ནས་བཤད་ན་དེ་ལྟར་རེད་མོད། སྦྱོར་བའི་ཁྲོད་དུ།རང་རེའི་མི་ཕལ་མོ་ཆེས་རྙིང་ཚབ་གསར་བརྗེ་ཞེས་པའི་མིང་བརྡ་འདི་ཐོས་རྗེས་ཀླད་པའི་ནང་དུ་མའོ་དྲན་གྱིན།ཚོར་ཤེས་གསེང་ལ་ཁྲག་བཞུར་ཏེ། སྒྲ་འཛིན་བུ་གར་མདའ་སྐད་གྲགས་ཀྱིན་ཡོད་པ་གང་གིས་མཚོན་ཞེ་ན། རྙིང་ཚབ་གསར་བརྗེ་ཞེས་པའི་མིང་བརྡ་འདི་ཐོས་རྗེས་ངག་ནས་བསམ་དབང་དྲན་དབང་མེད་པར་དམར་སྲུང་དམག་ཅེས་ཤོར་འགྲོ་བ་དེའི་གསལ་བཤད་བྱ་ཐུབ་པོ། ཨ་ཧོ།ལོ་ཟླ་འཁོར་ཞིང་དུས་ནི་འགྱུར་ཏེ་མི་ག་ཚོད་ཅིག་གི་དབུགས་ཆད་སོང་། ད་ནི་རང་རེ་བ་ཡང་མིང་བརྡ་འདིའི་མཁར་རྫོང་ལ་ཡང་བསྐྱར་དཔུང་འཇུག་བྱས་ཏེ་བསྐྱར་དུ་ཚད་འབྱེད་བྱ་རན་རེད། ཞིབ་ཅིང་ཕྲ་མོས་གླེང་ན་བློ་གྲོས་དང་ལྡན་པ་དག་ལ་བསྐྱར་ཟློས་ཡང་ཟློས་ཡིན་སྲིད་མོད། མི་སེར་མང་པོ་ཞིག་གི་གོལ་འཛོལ་སེལ་ཕྱིར།ངས་རྙིང་ཚབ་གསར་བརྗེ་ཞེས་པའི་མིང་བརྡ་འདི་སྣེ་འགའ་ནས་གླེང་དགོས་རྒྱུ་རེད། 

                                                 

བོའུ་སྐད་ཁྲོད་ཀྱི་རྙིང་ཚབ་གསར་བརྗེ།

                                              
  དྲག་རྩུབ་བཙན་གསུམ་ནི་འཇམ་ཞན་གཉོམ་གསུམ་གྱི་ལྡོག་ཚིག་རེད་ལ། དྲག་རྩུབ་བཙན་གསུམ་གྱི་རྙིང་ཚབ་གསར་བརྗེ་ཡིས།འཇམ་ཞན་གཉོམ་གསུམ་གྱི་འུ་ཅག་མི་སེར་ཚོའི་སེམས་ལ་མྱ་ངན་གྱི་ལོ་རྒྱུས་རྡོ་རིང་བཞེངས་ཡོད་ཅིང་། ཞེད་འཇིགས་ཀྱི་ངུ་འབོད་རྫོགས་མེད་རི་ལ་ཁྱབ་ཡོད། ལྟོགས་སྐོམ་གྱི་རུས་རྐང་གྲངས་མེད་ས་ལ་གཏོར་ཡོད། ས་དམར་པོར་བརྫིས་སོང་། ཆུ་དམར་པོར་བསྒྱུར་བཞག  འདི་དག་ནི་བོའུ་སྐད་ཀྱིས་བསླངས་པའི་རྙིང་ཚབ་གསར་བརྗེ་རེད་ལ། མཚོན་ཆ་ཡིས་བསྐྲུན་པའི་དྲག་པོའི་རྙིང་ཚབ་གསར་བརྗེ་བྱ་སྟངས་ཀྱི་གྲིབ་གཟུགས་ཀྱང་རེད། ང་བརྒྱད་ལོའི་དྲག་པོའི་རྙིང་ཚབ་གསར་བརྗེ་ཡི་རྐྱེན་པས།  ང་བརྒྱད་གླེང་ན་མིག་ཆུ་འཐོར་ཞིང་ཞེད་སྣང་སྐྱེ་བཞིན་པའི་བརྒྱད་ཅུའི་རྒན་རྒོན་དག་གིས།གནམ་ཏང་དང་ས་ཏང་ཡིན་པས་ཁྱེད་ཚོས་ཁ་འཁྲུག་བཤད་མི་ཉན་ཅེས་ད་དུང་ཡང་སྐྲག་སྣང་གི་སློབ་གསོ་གཏོང་བ་དེས། དྲག་པོའི་རྙིང་ཚབ་གསར་བརྗེ་ཡིས་བར་གླགས་དེར་ཁོ་ཚོའི་སྨྲ་བརྗོད་རང་དབང་གི་མཆུ་ཏོ་བསྡམས་ཤིང་། དད་མོས་རང་དབང་གི་བེམ་པོ་གཅུན་མྱོང་བའི་མཚོན་བརྡས་ངམ་ངམ་ཤུགས་ཀྱིས་འུ་ཚོར་བརྡ་རྟགས་གཞན་ཞིག་སྟེར་ལ། དྲག་པོའི་རྙིང་ཚབ་གསར་བརྗེ་ཡི་སྲིད་ཇུས་ལ་འགྱུར་བ་བཏང་ཞིང་། ཞི་བའི་བཅིངས་གྲོལ་ཞེས་པའི་ཁ་གཡང་ཞིག་དངོས་ཡོད་ཀྱིས་བསུ་རུ་བཅུག་མྱོང་བའི་ལོ་ཟླ་དག་གི་ཁྲོད་དུ་ཡང་། ད་དུང་“རློམ་རྒྱུ་མེད་པ་དང་སེམས་ཆུང་བྱེད་དགོས”ཞེས་སྐད་མགོ་དམའ་བའི་ནང་གཏམ་ཐུང་ཐུང་ཞིག་ཁྱེད་ཅག་གི་སྙན་དུ་སྦྲོན་པ་ནི། དམིགས་ཡུལ་གཞན་ཅང་མེད་དེ། རང་དབང་དང་དམངས་གཙོའི་ལམ་བུ་ཡོད་ཅེས་ཁ་གཡང་སྒྲོག་པའི་ད་ལྟའི་དུས་ལ་ཡང་མིག་ལམ་དུ་ང་བརྒྱད་ལོའི་ཁྲག་གི་འཇིག་རྟེན་ཞིག་དྲན་པ་ཙམ་མོ།།
     ཡང་།“ས་ཏང་ཡིན། “”གནམ་ཏང་ཡིན། ཁྱོད་ཅི་ཞིག་རེད།”ཅེས་པའི་དྲི་བ་འདིས་འུ་ཚོ་མི་ཞིག་ཡིན་པ་དང་། འགྲོ་བ་མིའི་ཐོབ་ཐང་ཞེས་པའི་ལམ་ལུགས་ཤིག་ཡོད་པ། ཡོངས་ཁྱབ་རིན་ཐང་ཞེས་པའི་ཤེས་བྱའི་སྒྲིག་གཞི་ཞིག་ཡོད་པ་སོགས་ནི་དྲག་རྩུབ་བཙན་གསུམ་གྱི་མེ་མདའ་དང་བཀྲེས་སྐོམ་གྲང་གསུམ་གྱི་མནར་གཅོད་ཀྱིས་ཁོ་པ་ཚོའི་ཀླད་པའི་རུས་ཆེན་ནང་ནས་རྩ་བརླག་ཏུ་བཏང་བ་རེད། མཐོང་ཐོས་མྱོང་འགྱུར་གྱི་དྲག་པོའི་སྦྱོར་བ་རེ་རེ་དང་ཐག་རབ་ཏུ་ཉེ་བའི་འགྲོ་བ་མིའི་རིགས་ལ་མཚོན་ན།
དྲག་རྩུབ་བཙན་གསུམ་གྱི་སྔུན་ནས་འགྲོ་བ་མིའི་ཐོབ་ཐང་གི་ལམ་ལུགས་ཟེར་བ་ནི་ཕུག་བསམ་ཞིག་མ་ཡིན་ནམ། 
མདའ་མདུང་གྲི་གསུམ་གྱི་ཁ་ནས་སྨྲ་བརྗོད་རང་དབང་ཟེར་བ་ནི་མི་ཡུལ་དང་ཁ་ཐག་རིང་བའི་ཉི་ཟླ་དེ་མ་ཡིན་ནམ།
   དེ་ལྟ་ན། འུ་ཚོ་སུས་ཀྱང་དྲག་པོའི་རྙིང་ཚབ་གསར་བརྗེ་ཡི་སྔུན་ནས་མགོ་བོ་ནང་དུ་བཀུག་སྲིད་པ་མ་རེད་ལ། དྲག་པོའི་གཉའ་གནོན་ཇི་ལྟར་ཆེ་ན་ཁྲག་གི་འོས་ལངས་དེ་ལྟར་རྒོད་པའི་ལོ་རྒྱུས་དངོས་མ། རང་གཞན་སུ་ཡི་དེབ་ཐེར་དུ་ཡང་ཧ་ཅང་གསལ་བ་ལ་ཨང་། ལོ་རྒྱུས་ནི་ལོ་རྒྱུས་རང་ཡིན་པས། སུས་ཀྱང་དཀྲོག་བཟོ་དང་བྱས་ཆོག་གི་མ་རེད་ལ། ལོ་རྒྱུས་ལ་དཀྲོག་བཤད་བྱེད་པ་ནི་སེལ་གོལ་འགའི་ཡུན་གྱི་ཁ་ཆོད་ཐབས་ཙམ་ལས་ཅི་ཡང་མིན་ཏེ། སྐྱག་པ་ཁ་བས་གཡོགས་པའི་དགོད་གཏམ་རང་རེད་དོ།། ངས་སྐྱག་པ་ཁ་བས་གཡོགས་པའི་དགོད་གཏམ་འདི་རང་གཞན་ཀུན་ལ་བཤད་དགོས་དེ། གྲང་རླུང་ཤུར་ཤུར་དུ་ལྡང་ཞིང་ཁ་བ་ལྷབ་ལྷབ་དུ་འབབ་པའི་མཚན་མོ་ཞིག་ལ། གྲྭ་ཕྲུག་ཅིག་ནམ་སྨད་དུ་སྒོར་འབུད་དུ་ཐོན་ཞིང་། རྐང་རྗེན་དུ་སྒོ་ཕྱི་རུ་རྒྱུགས་ཡོང་དུས། གྲང་ངར་དང་ཁ་བས་ཁོ་སྤྱོད་ཁང་དུ་འགྲོ་བའི་བསམ་བློར་བརྡབ་བསིག་བྱིན་ཏེ། ཁྱམས་ར་རུ་གཙང་སྤྱོད་དོར་དེ་སྟེང་དུ་ཁ་བས་གཡོགས་ནས་བཞག་སོ་སྐད། ཕྱི་ཉིན་ཉིན་གུང་གི་ཡས་མས་སུ་ཉི་འོད་ལམ་ལམ་འཕྲོས་ཤིང་། ས་གཞི་ཡོངས་སུ་དྲོས་ཏེ་རླངས་པ་ཐོལ་ལོར་གང་སར་གཤེགས་འདུག་ཅིང་། གྲྭ་ཤག་དེའི་ཁྱམས་རའི་ཁ་བ་ཡང་ཞུ་སྟེ་སྐྱག་ཆུའི་དྲི་ངན་དང་བཅས་རང་གཟུགས་ཕྱི་རུ་མངོན་པས་གྲྭ་ཕྲུག་དེའི་ཨ་ཁུའི་ལག་གི་ཁྲིམས་ཉོས་སོ་སྐད།
  དགོད་གཏམ་འདིས་དགོད་གཏམ་འདི་མཚོན་ཐུབ་པའི་ཕན་ཆད་ནས། ངས་གོང་དུ་འཆད་རྒྱུའི་ལོ་རྒྱུས་དཀྲོག་བཤད་བྱ་མཁན་དང་སྦ་སྐུང་བྱ་མཁན་དག་གི་འཁྲལ་འཁྲུལ་གྱི་རང་གཟུགས་ཀྱང་རྙེད་ཐུབ། དེ་བས་རང་གཞན་སུ་ཡང་སྐྱག་པ་ཁ་བས་གཡོགས་མཁན་དེའི་རིགས་མིན་པར་མཛོད། རང་གཞན་སུས་ཀྱང་ལོ་རྒྱུས་ནི་ལོ་རྒྱུས་རང་ཡིན་དགོས་པའི་དྭངས་གཙང་བདེན་པ་དེ་ཤེས་པར་སྨོན། ཡིན་ཕྱིན་མ་འོངས་པར་མི་རབས་ཤིག་གི་ན་གཞོན་ཚོས་རི་ཆུ་ནགས་གསུམ་དཔང་བར་བཅོལ་ཏེ་་ཉི་ཟླ་སྐར་གསུམ་གྱི་སྐད་འབྱོན་སྲིད།གསོང་བོའི་གློག་རྡུལ་མཁའ་ལམ་ནས་འོད་གསལ་ལམ་ལམ་དུ་འཕྲོ་བའི་ཉིན་མོར་སུ་དཀར་གང་ནག་རང་བཞིན་གྱིས་ལྷང་ལ་འབུད་ངེས་རེད།

                                                    ཚོར་ཤེས་གསེབ་ཀྱི་རྙིང་ཚབ་གསར་བརྗེ།

                                ཚོར་ཤེས་ཁོ་ནའི་གདུག་རྩུབ་ཀྱིས་ལུང་ཤར་བའི་རླིག་འབྲས་ཡང་ཕྱི་རུ་བཏོན་པ་མིན་ནམ།
                                                                                   ----རང་གི་སྐད་ཆ།

    ལོ་ངོ་འདི་དག་གི་རིང་ལ། ཟི་ལིང་ཆོས་གཏོར་ཚོགས་པ། ལན་གྲུ་ཡི་སྤྲུལ་གཏོར་ཚོགས་པ། མའོ་ཡི་རྗེས་ཁྱི། ཏང་གི་གཅེས་ནོར། ན་གཞོན་གསར་བ་ནི་རྒྱ་རྒན་ལོ་ལོན་ཞིག་རེད། ཕ་ཤི་རྒྱལ་རྔ་བརྡུང་མཁན་སོགས་བལྟས་མ་ཐག་འཇིགས་ཡེར་བའི་སྐད་ཆ་སྐོར་ཞིག་མི་དང་མི་ཡི་རྒྱུན་པའི་ཁ་བརྡའི་ཧྲག་བར་དང་། དྲ་ཚིགས་དང་དྲ་ཚིགས་ཀྱི་ཁོང་གསེང་ན་ཆེས་བྲིན་ཀྱིན་ཡོད་ལ། ཚོར་ཤེས་ཤུགས་ཆེ་བའི་ཐ་སྙད་ཀྱི་ཞྭ་མོ་ཆེན་པོ་འདི་དག་བསྐོན་དགོས་ནི་གོང་གི་མྱི་འདི་དག་གིས་ཆོས་ལུགས་ཀྱི་སྔུན་ནས་མྱི་སྐད་བཤད་པས་རེད་ལ། ཆོས་ལུགས་ལ་བལྟས་ཏེ་ཁྱོད་རིག་གནས་ཤིག་རེད་ཅེས་མྱི་ཚུགས་དང་གསར་ཚུགས་བསྟན་པས་རེད། དཔེ་ཕྲ་མོ་ཞིག་གིས་བཤད་ན། གནའ་ནས་ད་བར་དུ་ཆོས་ལུགས་ཀྱི་སྔུན་ནས་བོད་པ་ཚང་གོག་མ་ནུར་གྱིས་འོང་བ་དང་།ད་ལྟ་སྐོར་ཞིག་གིས་ཆོས་ལུགས་དང་ཆོས་ལུགས་པ་དག་གི་སྔུན་ནས་རྐང་བའི་སྟེང་ལ་རྐང་བ་བཞག་སྟེ་བསྡད་པས། སྦྱོར་བ་འདིའི་རིགས་ཏག་ཏག་ཞྭ་མོ་བསྐོན་མཁན་དེ་དག་གི་བསམ་བློའི་ཚད་ཤིང་གི་ནང་དུ་མ་ཚུད་པ་དང། ཀླད་པ་འགུལ་སྟངས་ཀྱི་ཁྲག་ཚད་ཀྱིས་མ་འདང་བ། ཀུན་གཞིའི་རི་ལུང་ལ་མ་ཤོང་བ་སོགས་ཀྱིས་དབང་གིས་གང་འདོད་དུ་སྡིགས་དམོད་བོར་བའི་ཚོར་ཤེས་ཀྱི་སྐད་ཆ་ཁོ་ན་རེད། ཚོར་ཤེས་ཀྱི་སྐད་ཆ་འདི་དག་ནི་གནའ་དེང་མའི་ལྟ་ལོག་པ་དང་སྨྱོན་པ་སོགས་ཀྱི་ཐ་སྙད་ཀྱི་ནུས་པ་ཉམས་པའི་རྗེས་ནས་བཏགས་པའི་དམོད་ཚིག་བོར་སྟངས་ཤིག་རེད་ལ། རང་མྱི་གསོད་སྟངས་ཤིག་ཀྱང་རེད། རང་མྱི་རང་གིས་གསོད་པའི་ཚོར་ཤེས་ཀྱི་སྐད་ཆ་འདི་དག་ནི་དྲག་པོའི་སྦྱོར་བ་བཀོལ་བའི་རྙིང་ཚབ་གསར་བརྗེ་དང་འདྲ་ལ། སྐད་ཆ་གཞན་ཞིག་གིས་བཤད་ན། སྦྱོར་བའི་ཁྲོད་ནས་རྙིང་ཚབ་གསར་བརྗེ་བྱེད་མཁན་ནི་རང་དང་འདང་རྒྱག་ཕྱོགས་མི་མཐུན་པ། སྐད་ཆ་བཤད་སྟངས་མི་གཅིག་པ་མཐའ་དག་ལ་ཉེས་འགལ་གྱི་ཞྭ་མོ་བསྐོན་ཏེ་ཚེར་མའི་ལམ་བུར་འདེད་མཁན་དེ་དག་མིན་པའི་ངེས་པ་ཁྱོན་ནས་མེད་ལ།  ཚོེར་ཤེས་ཀྱི་སྐད་ཆ་ཁོ་ནས་རང་རེའི་མི་བུ་དག་འཆི་ལམ་དུ་བརྫངས་པའི་ལོ་རྒྱུས་འོ་སྐོལ་ཚང་ལ་གསལ་བོ་ཏག་པོ་ཡོད་པ་མིན་ནམ། གནད་དོན་འདི་དག་ནི་འོ་སྐོལ་ཚང་རིག་གནས་སྣ་གཅིག་ལ་གོམས་པས་རེད་ལ། འདང་རྒྱག་ཕྱོགས་སྣ་གཅིག་ལ་ལོབས་པས་རེད། སྣ་མང་གི་རིག་གནས་དང་སྣ་མང་གི་བསམ་བློ་ཡོད་སའི་དཔལ་ཡོན་ལྡན་པའི་སྤྱི་ཚོགས་ལ་བར་ཐག་རིང་བའི་བདེན་དཔང་ཉག་གཅིག་ཀྱང་རེད།

                                                 དཔྱོད་ཤེས་ཀློང་གི་རྙིང་ཚབ་གསར་བརྗེ།

           བོད་ཀྱི་ན་གཞོན་གསར་བ་རིག་གནས་ཀྱི་མིད་དག་ཡིན་པ་ལས། ཆབ་སྲིད་ཀྱི་ལག་རྡོ་རུ་འགྱུར་ག་ལ་རུང་།
                                                                         _____རང་གི་སྐད་ཆ།
   བོད་ཀྱི་ན་གཞོན་གསར་བ་དང་ཆབ་སྲིད་ཀྱི་བར་ན་འབྲེལ་བ་ཅི་ཞིག་ཡོད་དམ་ཞེ་ན། འབྲེལ་བ་ཅི་ཡང་མེད་དེ། ན་གཞོན་གསར་བ་ནི་རིག་གནས་རྐྱང་བ་གླེང་སའི་གར་སྟེགས་ཤིག་ཡིན་པ་ལས། ཆབ་སྲིད་གླེང་བརྗོད་དང་ཆབ་སྲིད་ཀྱི་མིད་དག་དང་རྐང་ལག་ཏུ་གྱུར་རྒྱུའི་དཔེ་ཡང་གཞར་ནས་སྲིད་པ་མ་རེད། འོ་ན། ཅིའི་ཕྱིར་ན་གཞོན་གསར་བ་ནི་རྒྱ་རྒན་ལོ་ལོན་ཞིག་རེད་ཟེར་ན། ཁོ་ཚོ་ལ་ཅི་ཁག་སྟེ། ཁོ་ཚོས་བོད་ཀྱི་ན་གཞོན་གསར་བ་དང་རྒྱ་ནག་གི་ན་གཞོན་གསར་བ་ཕྱོགས་ཡོངས་ནས་གཅིག་ཏུ་བལྟས་པས་རེད་ལ། ཁོ་ཚོས་རིག་གནས་ཤིག་གི་མགྲིན་ཚབ་བྱས་ནས་ཡུན་རིང་འགོར་བའི་ན་གཞོན་གསར་བ་དང་ཆབ་སྲིད་ཀྱི་ལག་རྡོ་རུ་གྱུར་བའི་ན་གཞོན་གསར་བ་གཉིས་ཀྱི་དབྱེ་མཚམས་མ་ཤེས་པས་རེད། དེ་ལྟ་ན་བོད་ཀྱི་ན་གཞོན་གསར་བ་དང་རྒྱའི་ན་གཞོན་གསར་བ་གཉིས་ལ་མིང་འདྲ་བའི་ཕན་ཆད་ནས་མཐུན་ཆ་གཏན་ནས་མེད་དམ་ཞེ་ན། དེ་ཡང་མ་ཡིན་ཏེ་རིག་གནས་ཤིག་གི་མིད་དག་ཡིན་སྐབས་ཀྱི་རྒྱའི་ན་གཞོན་གསར་བ་སྟེ། ལུའུ་ཞུན་དང་ཧུའུ་ཧྲི་ཡི་ཁྲོ་ཞོར་དུ་དགག་ཅིང་དང་དགོད་ཞོར་དུ་སྒྲུབ་པ་དང་། འོ་སྐོལ་གྱི་ད་ལྟའི་སྦྱོར་བའི་ཁྲོད་དུ་ཕ་རོལ་གོང་བཀུར་བྱས་ཏེ་ལག་ལེན་གསེབ་ནས་བག་ཆགས་རྙིང་བ་ཞིག་གི་རྩིད་པ་འབྲེག་པའི་ཚ་རླབས་གཉིས་ཡོངས་སུ་འདྲ་ལ། དེ་ལས་ཟློག་སྟེ་ཆབ་སྲིད་ཀྱི་མགྲིན་པ་རུ་གྱུར་བའི་རྒྱའི་ན་གཞོན་གསར་བ་དང་བོད་ཀྱི་ད་ལྟའི་ན་གཞོན་གསར་བ་ལ་གཞི་མཐུན་ཁྱོན་ནས་ཡོད་སྲིད་པ་ཞིག་མ་རེད་དོ།། འདི་ནི་ལྷན་རྒྱས་ཀྱིས་གསལ་བོར་ཤེས་དགོས་པའི་དབྱེ་མཚམས་ཤིག་སྟེ། སྣེ་འདི་ནས་གོམ་པ་སྤོས་ཏེ།འུ་ཚོས་དཔྱོད་ཤེས་ཀློང་གི་རྙིང་ཚབ་གསར་བརྗེ་ཟེར་ན་ཡང་འདྲ། བག་ཆགས་དོང་སྤྲུགས་ཟེར་ན་འཁུ། གང་ལྟར་་མིང་བརྡ་འདི་དག་ནི་སྐད་ཆ་སྐོར་ཞིག་གི་མཚོན་བརྡ་ཙམ་རེད་མོད། མདོར་དྲིལ་ན། འོ་སྐོལ་ཚང་ཡང་སྣ་མང་རིག་གནས་ཤིག་གི་ལམ་བུར་བསྐྱོད་དེ་ཡོངས་ཁྱབ་རིན་ཐང་གི་ཤེས་བྱ་སྒྲིག་འཛུགས་བྱེད་པ་དང་། མི་རང་ཉིད་ནས་མགོ་བརྩམས་ཏེ་རང་དང་ཆེས་ཐག་ཉེ་བའི་འཚོ་བ་དང་བརྩེ་དུང་། ཁོར་ཡུག སྤྱི་ཚོགས། མི་ཚེ་སོགས་གླེང་བ་ལས། རིག་གནས་ཤིག་གི་བཀོད་འདོམས་འོག་ཏུ་ནམ་ཡང་ལམ་བུ་ཆིག་རྐྱང་ཞིག་ལ་བགྲོད་ཀྱིན་པའི་རྙིང་སྲོལ་མཇུག་རྫོགས་རན་སོང་། འདི་ནི་ངས་འཆད་ཀྱིན་པའི་དཔྱོད་ཤེས་ཀློང་གི་རྙིང་ཚབ་གསར་བརྗེ་ཡིན་ལ། འུ་ཚང་གི་ཕྱི་རབས་པ་དག་གིས་བདམས་སྲིད་པའི་འཕེལ་རྒྱས་ཀྱི་ལམ་བུ་ཞིག་ཀྱང་ཡིན། ད་དུང་ཧ་གསལ་བོ་ཞིག་མི་གོ་ན། ངས་འདི་ལྟར་བཤད་ཆོག་སྟེ། གལ་ཏེ་ཀུ་ཤུ་ཕྱི་མཛེས་ནང་རུལ་ཞིག་ཡོད་པའི་དབང་དུ་བཏང་ན། གཞན་གྱི་མིག་ལམ་ནས་མཛེས་མཛེས་ཡག་ཡག་ཅིག་ཡིན་རུང་། ཀུ་ཤུ་འདི་རོལ་མྱོང་བྱེད་མཁན་ཞིག་ཡིན་ན་ད་གཟོད་ཀུ་ཤུའི་ནང་སྙིང་ཧ་གོ་བ་རེད། དེའི་ཕྱིར་བོད་ཀྱི་རིག་གནས་ནི་ཀུ་ཤུ་ཞིག་ཡིན་པའི་དབང་དུ་བཏང་ན། ཕྱི་མཛེས་ནང་རུལ་ཞིག་ཏུ་འགྱུར་མི་རུང་བ་དང་། གཞན་དག་གིས་བོད་ལྗོངས་ནི་ཤམ་བྷ་ལའི་དག་ཞིང་ཡིན་པ་རེད་ཅེས་མཚར་མདོག་བསྟན་ཏེ་གནའ་རྫས་ཤིག་གི་ཚུལ་དུ་བཞག་སྟེ་རང་གཞན་གཉིས་ལ་འཁྲུལ་སྣང་སྟེར་བའི་སྐབས་སུ། ངས་ནི་བར་སྐབས་འདིར་འུ་ཚོས་ནང་གི་རྟོགས་པ་སད་དགོས། མི་རེ་རེ་ནས་རྟོགས་པ་སད་པའི་ཉིན་མོ་ནི་འུ་ཚོས་མིའི་སྤྱི་ཚོགས་ཤིག་གི་གདེངས་རྙེད་པའི་ཉིན་མོ་ཡིན་ཟེར་འདོད་ལ། གཞན་ཞིག་མཐོ་ས་ནས་བསྡད་དེ་ཡིན་མདོག་གིས་སྐད་ཆ་ལབ་དུས། འུ་ཚོས་ཞིབ་མདང་གི་མདའ་ཁ་རང་ལ་བསྐོར་ན་རང་ཉིད་ཀྱི་ཚད་གཞི་གང་ན་ཡོད་པ་ཧ་གོ་བ་རེད། ཏག་ཏག་ང་ལ་མཚོན་ན་རིག་གནས་ཤིག་གི་བརྡ་རིག་གནས་ཤིག་ལ་གསལ་བོར་སྟོན་པ་ནི་ཆེས་དཀའ་ཚེགས་ཆེ་བའི་ལས་ཤིག་སྟེ། ད་ནི་རང་གི་རྩོམ་ཡིག་གིས་ཅི་ཞིག་བརྡ་བསྟན་ཡོད་སྙམ་པའི་སྐབས་སུ་ཡང་ཕ་རོལ་བོས་རྩོམ་སྙིང་ལས་རིང་དུ་གྱེས་ཏེ་གོ་བ་ལེན་པ་མཐོང་ཐེངས་རེར། ང་རང་ཁུ་སིམ་མེར་སྡུག་གི་ཡོད། འདི་ནི་ཕལ་ཆེར་ཁེར་རྐྱང་གི་རྩོམ་པ་པོ་ཞིག་ལ་མ་གཏོགས་ཡོད་མི་སྲིད་པའི་ཚོར་བ་ཡིན་སྲིད། འཕྲོས་ཐལ་མོད། གོང་གི་སྐད་ཆའི་མཇུག་ཕྱིར་སྦྲེལ་ན། བོད་ལྗོངས་ཏག་ཏག་མང་པོ་ཞིག་འཇམ་ཡུག་ཡུག་གིས་འཆད་ལ་དགའ་བའི་ཟས་གོས་རང་གྲུབ་དང་། གཞལ་ཡས་དག་གཙང་གི་ཤམ་བྷ་ལའི་དག་ཞིང་དེ་ཡིན་ནམ། ངས་འདི་ལྟར་རང་ཉིད་ལ་དྲི་བ་ཞིག་འཕངས་རྗེས། དེ་འུ་བུ་ཅག་གི་ཀུན་གཞིའི་གསེབ་ན་མེད་དམ་ཅེས་བརྗོད་དགོས་སོང་།